||
是誰發明了一人燒肉架呢? 簡直應該比個獎佢。由日本推廣到香港，岩晒想食燒肉，但又比唔起時間及胃口同金錢。
呢間招牌燈箱好日本FEEL，好易吸引人眼球
加埋呢個黑板上所寫嘅字，點可以唔係度開返餐呀?!
套餐最平由$48就有交易，想食好D?! 都有Ａ４和牛
肉類無經醃製，有6款調味料比你自己選擇，而其中呢2款: 燒肉汁同辣椒蒜香醬係佢地自家製嘅。
牛小排X封門柳套餐，成個套餐包埋白飯，轉紫菜飯就另加$8，仲有海帶湯/味噌湯，仲有泡菜/沙律選擇。
汽水$8支，第二支仲要有半價，燒肉又點可以無可樂呀?!
呢度份量係200g，即係每款有100g，牛小排脂肪分分平均，唔會白多過紅。
店員建議火爐度數係3-4度之間就最岩，去到5驚肉會好快燒乾。抽風位為爐嘅兩邊，食完無燒肉味，正呀!
每邊只需十零秒就食得，點佢個辣椒蒜香醬，微辣中帶點甜味，加埋牛脂嘅香味，總結係…………好好味喎。
而封門柳相對無咁”肥”，各有賣點，配飯及泡菜一啖食，又係唔錯嘅食法。
牛舌套餐，四款口味，店員話最多人食係黑松露蒜蓉味
身為芫荽黨黨員，當然要忠於會旨啦。
呢度係300g份量，成個餐只係$108，相當抵食。
薄切牛舌都唔細塊架，亦由於係薄切關係，好快就食得。當兩面轉色時，再加D芫荽蒜蓉上去就食得。
一啖一舊無懸念，牛舌嘅軟身又帶點嚼口，香濃蒜味蓋過咗芫荽味，有一點蒜辣刺激，個人覺得可中和牛舌嘅膩度。讚!
唔係幾夠喉?! 可以單點追加，我哋就追加咗鷄肉，呢度係200g，只需$28，你無睇錯，真係$28咋。
自己加鹽及黑椒調味，又變成另一款食法。鷄件都相當厚肉，連帶少少鷄皮，燒至脆身，真係有去食串燒嘅效果。不禁追加多一份，咪講笑。
眼見附近嘅客人都有叫呢客菠蘿，莫非呢度嘅名物，當然唔執輸啦，只需$18。
大大件燒至外面稍為乾身，咬入去仍然係爆汁，味道甜中帶少酸，當作”飯後果”，幫助消化都唔錯，唔怪之得咁多人枱面都有佢嘅出現。
注意用餐時間為60分鐘，想燒多D嘅就要自己預返時間啦。
#japan #food #foodie #foodiehk #一人燒肉 #太子 #foodblog
