少年成長今日: 1|主題: 15714

收藏本版

回覆發帖

返回列表

跳至頁

查看: 13905 | 回覆: 0

驗眼

csir3290

子爵府

積分: 10126

發表於 23-3-5 10:52 |顯示全部帖子

昨日係半年一次同阿仔阿女去做例行驗眼嘅時間，兩姊弟細細個開始已經去理大視光中心每半年驗一次眼，一路都覺得佢哋跟得幾好，最開心係自從用咗佢哋嗰個控制近視鏡片之後，兩姊弟嘅近視都冇再加深，連視光師都話佢哋控制得好好，由2020年開始一路到而家兩姊弟嘅近視度數一路都keep住好好冇加深度，視光師仲話連家姐嘅散光都少咗25度添！所以我一路都推薦畀啲親戚朋友如果細路仔要檢查眼睛或者配眼鏡都可以考慮去理大視光中心度做檢查同埋配眼鏡，因為佢哋嘅服務做得好全面。絕對冇賣廣告嘅成分，因為每半年驗一次眼都係真金白銀幾百蚊畀錢只係做驗眼，小朋友控制度數鏡片亦都係真金白銀比錢配而且都唔平，不過效果真係幾理想，今日我老婆先至話雖然細佬副眼鏡有啲貴2020年配嘅時候都要三千幾蚊，但係睇住佢三年嘅度數都冇再增加個而且控制得咁好都覺得抵。

昨日驗眼嘅時間喺時光中心等咗一輪，見到一個好奇怪嘅家長，佢哋應該係一家人對父母帶住對仔去驗眼，首先畀佢哋吸引嘅原因係因為佢哋嘅說話入面又中又英，而且講得好大聲。我相信係對父母想對仔女講多啲英文啦！但係佢哋又唔係全英文交談，總之就一句中一句英，尤其是去啲到啲重要嘅字眼突然間又轉返廣東話。我唔係覺得話同仔女講多啲英文有問題，我都明白好多家長想仔女講多啲英文所以喺日常生活都會同佢哋講英文，但係咁樣又中又英嘅環境其實對佢哋學英文亦都冇乜好處，再加上父母嘅英文其實都係麻麻地，所以我總覺得與其係咁不如父母同佢哋講廣東話，然之後細路仔多啲睇英文書，多啲睇英文嘅節目同埋聽英文，其實可能幫助重大，起碼當佢哋講英文嘅時候係一個全英文嘅環境。就好似我對仔女咁，其實我同老婆喺日常嘅生活入面完全唔會同佢哋講英文都係講廣東話，但係當佢哋要講英文學英文嘅時候，佢哋嘅語境就係全英文，所以我都覺得其實我對仔女嘅英文雖然唔算得上係好好，但係亦唔係差。總之咁樣中英夾雜，又中又半英而且仲要係一句說話入面又中又英其實對細路仔學英文唔會有太大幫助反而可能仲有反效果。
另外一個呢家人令到其他人留意嘅地方就係，當個小朋友應該大約四五歲驗完眼出嚟，阿媽就已經好緊張不停好大聲咁問個仔點解會有近視，佢好似非常接受唔到自己個細仔有近視咁，佢不停好大聲咁同個仔講問佢點解會有近視又話佢哋全家人都冇近視，但係我望一望佢個大仔其實都係戴眼鏡，照計應該冇遺傳，點解個細仔會近視，個阿媽真係好接受唔到，佢仲不停話個仔係咪成日偷睇ipad，又話佢有啲乜嘢壞習慣佢哋唔知道，個爸爸又成日同個老婆講話應該係個仔有啲壞習慣佢兩公婆唔知，所以個仔先至會近視，總之就好大聲喺個視光中心入面不停係咁講，搞到好多家長其實都偷望佢哋，更好笑嘅係佢不停同個仔講叫佢唔好再偷睇ipad，但係佢個講法係不停問個仔好唔好？好似係要個仔真係應承佢唔再偷睇ipad為止！因為佢實在講得太大聲，其他人都覺得佢哋有啲騷擾。但係佢個細仔一路都冇答佢好只不過係不停同佢講價，但佢阿媽就係要個仔答到一個「好」字為止先至肯收聲。但係其實嗰部ipad係邊個畀個細仔嘅呢？如果呢個家長覺得個細仔睇ipad係有問題嘅咁點解會畀佢自己收埋部ipad呢？既然佢覺得個細仔冇自制，其實你做家長，只係一個4、5歲嘅細路仔，係咪應該主動去控制呢？而唔係不停喺度問好唔好。有啲家長就係咁，以為四五歲嘅細路仔你同佢講道理，希望個細路仔會明白，然之後做到自願應承家長嘅要求。但係家長其實心入面根本就係冇得比個細路仔選擇，只不過係想佢口頭上做到好似自願答應咁！個細路仔一路唔講個好字佢就不停係側邊哦佢同埋話佢不停咁問。講真咁細個嘅細路仔你只係要話畀佢聽邊啲嘢唔啱唔可以再做就可以。
成個驗眼嘅過程由驗眼檢查到最後需要配眼鏡再配埋眼鏡其實都差唔多成四十五分鐘，整個過程喺視光中心上面其他人全部都目擊，從其他人嘅眼神中有啲都覺得呢個媽媽好騷擾！到最後佢哋畀完錢離開咗之後連接待嘅職員都即刻喺度細聲討論呢個家長。事實有啲家長就係咁唔自覺，以為自己教緊仔就理所當然，根本就唔知道自己騷擾緊人哋，其實成個過程入面佢同個仔講嘅嘢根本返屋企可以慢慢講！同埋有陣時細路仔近視嘅成因就有好多因素造成，有近視個細路仔亦都唔想，你不停怪個細路仔亦都冇用。如果覺得係由佢嘅生活習慣造成，咁就應該著力改善佢嘅生活習慣，但係唔係靠個細路仔自己做呢？要一個4，5歲嘅細路仔有自制能力自己可以改變自己嘅生活習慣都真係幾匪夷所思。總之琴日呢一對家長真係令其他人大開眼界！

私人傳訊回覆引用

跳至頁

返回列表

回覆

發帖

頻道

討論區

熱門搜尋：

少年成長 今日: 1|主題: 15714

少年成長今日: 1|主題: 15714